Pole Pole

Na Jasper “Kido” (@KidoJapa)

Salamu nakutumia,
pole nakuambia,
Kaka Pole, nakuandikia,
Kaka, pole nakuusia

Pole kwa matanga
Kwako na kwangu pia,
Pole kwa majanga
na dhahama za dunia

Pole kwa kufiwa
na simanzi ilokufika,
Pole kwa ukiwa,
Mzazi amekutoka

Pole kwa mamlaka
wadhfa na kadhalika,
Pole kwa kuchoka
kwa utendaji ulotukuka

Si shaka ulitutenda
Mitano tulitendeka,
Kazio uliipenda
wala hukukwazika

Ila leo kuruta…
Amri imekukuta,
Ile “nyuma geuka”
Kizito kimekufika

Si kingine hata
cha sheria zenye ukuda,
Urasimu zizojikita
Hasimu zimekukwida

Pole kwa makasia
na mbizi usiku kucha,
Dhoruba mekufikia
chombo sasa kimekuchocha

Ukuu umekimbia
Ukambo umesalia,
Hadeki wakufikia
Waswahili wakuambia

Pole kwa kuchetuka,
Ilikupasa kwa hakika,
Tambo zako na dhihaka,
kwetu zote zilitufika

Ya nguoni ulituvika
Tukakoma na kukomoka,
Sujuda uliitaka,
Tukakuvika na ya ukoka

Pole kwa pilika
mtaala kuusuka,
Pole kwa patashika,
na gharika za mamlaka

Kongole kwa maarifa
na shule ilotukuka,
Jamii inayo ufa
wa elimu ya matabaka

Tatizo unayefundisha
Moyoni umetutoka,
Mbona leo kutupasha
Habari za madaraka?

Jana haikukufaa?
Au hukuupata wasaa?
Mawili kuyashika
Yangeweza kuponyoka?

Au haikuwa haja
na shule haikuwa tija?
Baba alikukosha
ukakosa cha kufundisha?

Bado nina mashaka,
Pengine alikataza?
Na sasa kapumzika
Nawe unateleza

Pole kwa fedheha
na kadhia zinazokufika,
Pole kwa waso staha
Japo nduguzo wa uhakika

Kikulacho ki nguoni
Wahenga walitujuza,
Kinjano, kijani,
Hadharani chajikweza

Si kingine, cha tawala,
Kidumu kisicho dira
Kigumu kilicho dola,
Chaitafuna hadhira

Pole kwa kuchelea
Shuka kulikumbuka,
Pole kwa kupelea
Na jikoni ukatoka

Pole kwa kurejea
Duniani kwenye shuruba,
Pole kwa kukemea
kwa kuyakosa mahaba

Pole kwa kuchochea
Moshi upate kuwaka,
Pole kwa kuchelea
Samaki keshakauka

Pole nakusisitizia
Kwa ukuu kukukimbia,
Mtu baki mesalia
Nchini Tozonia

Pole kwa hujuma,
Wahuni si watu wema
Mirathi wamekunyima,
Wamekutenda yatima